نه‌ور‌ۆز

که‌ریم شاره‌زا

نه‌ورۆزه‌ مه‌ستم به‌ نه‌غمه‌ی بولبول

مه‌ستم به‌ عه‌تری وه‌نه‌وشه‌ و سومبول

شادم به‌ هاژه‌ی ڕووباری به‌فرین

سوورم به‌ شڵپه‌ی شه‌پۆلی زێوین

کێو و گرد و دۆڵ، باخ و ده‌شت و ده‌ر

جوان خه‌مڵیون تێکڕا سه‌رانسه‌ر

گوڵی گوڵزار و دره‌ختی ده‌م یاڵ

هه‌ڵپه‌ڕکێیانه‌ به‌ شنه‌ی شه‌ماڵ

تیپی حاجیله‌ و گوڵوکی ڕه‌نگین

بوونه‌ نیگاری قاڵیی رووی زه‌مین

خۆری پڕشنگدار له‌ ئاسمانی شین

پێ ئه‌که‌نێ بۆ چیمه‌نی نه‌سرین

پۆلی په‌پووله‌ی نه‌خشینی جوان جوان

هاتوچۆیانه‌ به‌ سه‌ر ڕووی گوڵان

شمشاڵی شوان و باڕه‌ی کارژۆڵان

جریوه‌ و جووکه‌ی به‌ سۆزی مه‌لان

به‌ره‌ و گوێچکه‌ی دڵ دێن له‌ دۆڵ و ده‌شت

خۆش وه‌ک ئاوازی مۆسیقای به‌هه‌شت

له‌ هه‌ر لا مرۆ مه‌سته‌ به‌شادی

مه‌سته‌ به‌ خۆشیی ڕۆژی ئازادی

ڕۆژی پچڕانی زنجیری ژیان

جه‌ژنی نه‌ورۆزی کورد و کوردستان

 

21.3.1958